Më 2050 bota do të ketë 9 miliardë banorë

Bota jonë do të bëhet krejtësisht e panjohur deri më 2050, nëse vazhdon me ritmet e sotme. Duket se botën siç e njohim sot nuk e pret një e ardhme optimiste. Së paku kështu janë përfundimet e shkencëtarëve të nxjerra në konferencën shkencore amerikane, raporton agjencia e lajmeve AFP.

Shkencëtarët janë shprehur se problemi kryesor i “shkatërrimit” tonë qëndron në rritjen e numrit të banorëve dhe betejës për resurse, që për 40 vjet do të duhej të sjellë deri tek ndryshimi i tërësishëm i botës siç e njohim sot.

Vlerësimet flasin se deri në fund të këtij viti numri i popullatës së botës do të rritet në shtatë miliardë, kurse deri më 2050 ky numër do të mund bëhet nëntë miliardë. Rritja më e madhe e popullatës do të ndodhë në vendet e varfra të Afrikës dhe Azisë Jugore.

Pikërisht ky fakt do të çojë në problemet më të mëdha, pasi për t’u ushqyer aq shumë gojë, gjatë 40 vjetëve të ardhshme do të duhej të prodhohet aq ushqim sa është prodhuar gjatë tetë mijë vjetëve të fundit.
Përveç mungesës së ushqimit, edhe një faktor tjetër në shndërrimin e botës çfarë ne e njohim, është edhe numri tepër i madh i popullatës, për shkak të cilit ekspertët demografikë kërkojnë program për planifikimin e familjeve.

“Është koha e fundit që të bëhet diçka për këtë çështje. Gjatë 20 vjetëve të fundit nuk është bërë përkujdesje për këtë, mirëpo për shkak të çmimit të ushqimit dhe ngrohjes globale do të na duhet të ndërmarrim disa hapa”, janë shprehur ekspertët pjesëmarrës të kësaj konference.