Turizmi në vendin tonë

Natyra e gjallëruar, uji i ftohtë dhe i rrjedhshëm, shërbimi në lokalet dhe restorantet aty, të kujtojnë se natyra e ka përkëdhelur këtë pjesë toke që ende nuk e ka humbur virgjërinë e saj.

Ujërat e Jonit lagin vijën bregdetare, duke formuar plazhe, ku bardhësia e guralecëve është në kontrast të fortë me blunë e detit. Ujërat e kristalta këtu vende-vende marrin ngjyrën e smeraldit.Bregdeti i Jonit mbetet i preferuari i turistëve për të kaluar pushimet e verës.

Bukuritë mahnitëse që ofron riviera shqiptare tërheqin turistët të rikthehen sërish në jug të vendit për të pushuar .Menjëherë pas ngjitjes në Qafën e Llogarasë panorama që shfaqet është magjepsëse.Rruga që gjarpëron mes një terreni të thepisur zbret fillimisht në plazhin e Dhërmiut.

Fshati me ndërtimet karakteristike ruan ende fizionominë e kohëve të vjetra dhe po ashtu edhe rruga 1.5 kilometra e gjatë që të çon fare afër bregut.Plazhet e Himarës, Borshit apo Lukovës, që ndodhen pak kilometra më tutje, janë një tjetër alternativë për të pushuar në brigjet e Jonit.

Udhëtimi drejt Sarandës dhe Ksamilit i jep fund kësaj perle të turizmit shqiptar që jo më kot, klasifikohet si elitar, dhe tërheq çdo ditë e më shumë interesin e turistëve nga e gjithë bota.